Pólverjinn

Pólverji nokkur þurfti að endurnýja ökuskýrteinið sitt, þar sem það gamla var útrunnið. En fyrst þurfti hann að gangast undir augnskoðun hjá augnlækni, áður en sýslumannsembættið léti Pólverjanum í té nýtt ökuskírteini.
Augnlæknirinn lét hann lesa á spjald með stöfunum "C Z W I X N O S T A C Z".
,,Getur þú lesið þetta?" Spurði augnlæknirinn.
,,Lesið þetta?" Endurtók Pólverjinn. ,,Ég þekki manninn!"

Packardinn kominn heim.

Þessi gersemi sem er einn af merkustu farartækjum bílasögu Íslendinga er loksins kominn á þann stað sem honum sæmir til framtíðar. Á sjálfa Bessastaði.

Saga Packardsins:

Packard-bíll árg. 1942, sem nú er kominn heim á Bessastaði, var forsetabíll Sveins Björnssonar, fyrsta forseta lýðveldisins. Forsetaembættið notaði Packardinn árin 1945 og 1946, síðan var ríkisstjórnin með bílinn fyrir gesti sína og aðra virðingarmenn fram til 1950. Eftir að ríkisvaldið hætti notkun á Packardinum var hann seldur Halldóri Þormar sem notaði hann við atvinnurekstur fram á miðjan sjötta áratuginn. Þá eignaðist bílinn Sveinn H. Brynjólfsson sem einnig notaði hann í atvinnuskyni. Sveinn var sá síðasti sem var með Packardinn í notkun. Seinna eignaðist Gísli Hannesson í Hafnarfirði bílinn og átti hann í áratugi, en notaði hann aldrei. Að sögn vina Gísla var það metnaður hans að varðveita þennan merkilega bíl um sína daga og vonaði hann að aðrir tækju við varðveislunni eftir sinn dag. Sá aðili varð Þjóðminjasafn Íslands árið 1998 en þá var bíllin orðinn allnokkuð lúinn.

Eftir að Packardinn komst í eigu Þjóðminjasafnsins, fóru fulltrúar þess og Bílgreinasambandsins fram á viðgerð á bílnum fyrir áratug síðan. Ákveðið var að koma bílnum í upprunalegt horf og að verkefninu stóðu Þjóðminjasafnið, forsetaembættið og Bílgreinasambandið. Hugmyndin var að Packardinn mætti nota sem viðhafnarbifreið forsetaembættisins. Viðgerðinni er löngu lokið og bíllinn stóð lengi tilbúinn og nýuppgerður á verkstæði Bílaréttinga- og sprautunar Sævars Péturssonar í Skútuvogi. Sævar segir að hátt í 4.000 vinnustundir liggi að baki viðgerðinni. Sævar stóð lengi í stappi við að fá viðgerðina greidda og þeir sem komu að samningnum um viðgerðina stóðu alllengi ekki í skilum.

Viðgerðin hefur kostað vel á annan tug miljóna króna! Þeir aðilar sem áttu að standa straum af kostnaði, báru því við að Sævar hefði farið fram úr þeim heimildum sem veittar voru til verksins. Því var Sævar ekki sammála. Ekki voru smíðaðir nema 700 bílar af þessari gerð á sínum tíma og varahlutirnir voru því vandfundnir.

En sem betur fer endaði þetta allt saman vel, Sævar fékk greitt fyrir sína vinnu og Packardinn er kominn á Bessastaði. Það fór vel á því að Forsetinn skildi fagna endurkomu bílsins með þreföldum húrrahrópum!

Heimildir og tilvitnanir 

 

Bónvörur sem notaðar eru á bíla forsetaembættisins.

Fyrsti forsetabíllinn

Söng- og leiklist...

....er frístundariðkun sem dóttir mín hefur verið í frá 6 ára aldri hjá Sönglist í Borgarleikhúsinu. Hún hefur notið þar frábærar leiðsagnar margra góðra söng- og leiklistarkennara þó einkum Erlu Ruthar Harðardóttur leikkonu og Ragnheiðar Hall söngkennara, en þær reka Sönglist, söng- og leiklistarskóla fyrir börn og unglinga. Á þessum 6 árum sem dóttir mín hefur verið í Sönglist, hefur alltaf verið mikið tilhlökkunarefni hjá okkur hjónum að fara á frumsýningu og sjá afrakstur vetrarins hjá dóttur okkar og hennar meðleikurum í enda hverrar annar. Hefur þetta verið snilldarskemmtun í alla staði, þar sem hver og einn nemandi fær að láta ljós sitt skína með leik og söng. Gaman hefur verið að fylgjast með framförum krakkanna frá ári til árs. Þó einkum framförum frumburðar okkar hjóna (eins og gefur að skilja ). Í gærkvöldi var lok annar leiksýning hjá krökkunum á Nýja sviði Borgarleikhússins. Ásamt konu minni og syni, voru báðar ömmurnar einnig með í för. Líkt og við hjónin, hafa þær varla misst af lok annar sýningu hjá barnabarni sínu. Að lokinni sýningu hvarf vart af okkur brosið, svo stolt vorum við af dótturinni sem stóð sig með miklum sóma. Læt hér fylgja videoskot af dóttur minni, Indíönu Björk, þar sem hún syngur "Það er dýrt að vera ég" sem ég tók á frístandandi myndavélina. Gæði myndar og hljóðs er af skornum skammti en vona þó að þetta komist sæmilega til skila.

Gleðilegt sumar öllsömul

 

 

 

Vel þjálfað fylgdarlið Berlusconis

 

Þegar NATO fundurinn var haldinn í Reykjavík í maí 2002. Voru þar saman komnir mörg fyrirmenni eins og t.d. Robertson lávarður þ.v. framkvæmdastjóri NATO, Collin Powell þ.v. utanríkisráðherra Bandaríkjanna, Joscha Fischer þ.v. utanríkisráðherra þýskalands, Jack Straw þ.v. utanríkisráðherra Bretlands, Halldór Ásgrímsson þ.v.  utanríkisráðherra o.fl. 

 

Fundurinn fór að mestu fram í stóra salnum í Háskólabíói. Ásamt Háskólabíói, voru húsakynni Hótel Sögu og Hagaskóla einnig undirlögð vegna fundarins. Á Hótel Sögu gistu nokkrir þessara þjóðaleiðtoga á meðan á NATO fundinum stóð. Einnig snæddu NATO gestirnir í Súlnasal Hótels Sögu. Byggingarnar þrjár voru allar afgyrtar ásamt því að mikið löggæslulið vaktaði svæðið undir alvæpni. Þurfti sérstaka passa til að komast inn á svæðið. Vinnu minnar vegna, var ég mikið á hótelinu og komst þá ekki hjá því að rekast stöku sinnum á áðurnefnda kappa, sem komu flestir ákaflega eðlilega fyrir sjónir. Kom manni þó á óvart hvað sumir af þessum mönnum voru lágir í loftinu að vart stóðu þeir fram úr hnefa eins og t.d. lávarðurinn.

En einn þessara þjóðhöfðingja var "stór" þó hann væri lágur vexti. En það var Berlusconi þ.v. forsætis- og utanríkisráðherra Ítalíu. Mér er það mjög minnisstætt þegar Berlusconi gekk valdmannslega inn í hótelmóttökuna, af einum fundinum í Háskólabíói, að þar fór ekkert á milli mála hver væri að koma í hús. Í kringum þennan litla mann með stóra Egóið var hjörð lífvarða í dökkum jakkafötum, með dökk gleraugu og eyrnaplögg. Berlusconi, sem var með  ljósan skósíðan frakka með loðfóðri í boðungunum tiltan á axlirnar án þess að vera með hendur inn í ermunum,  gekk greitt inn gólfið með lífvarðar hersinguna á eftir sér. Skyndilega yppti Ítalski forsætisráðherrann lítillega öxlum án þess að segja orð og einn af öryggisvörðunum sem fyrir aftan hann var stekkur til og tekur af honum frakkann, án þess að ráðherran svo mikið sem hægði á göngunni, eða þá að neinn í hópnum sýndu nokkur svipbrigði. Virtist bara vera hinn eðlilegasti gjörningur. Þetta var sjón að sjá. Ætli Berlusconi taki upp fyrri valdsmanns takta þegar hann kemst til valda á Ítalíu að nýju? 

 

 

 

 

 

 

 

 

 

 

 

 

Garðar bróðir að störfum sem pikkaló, þegar Robertson lávarður kom á Hótel Sögu til að vera viðstaddur NATO fundinn 2002

Berlusconi spáð öruggum sigri í öldungadeildinni

Það er farið að glitta í meistaratitilinn....

 

....hjá mínum mönnum í Manchester United. Þetta var stórglæsilegur sigur á annars sterku liði Arsenal. Stórt skref var stígið í átt að Meistaratitli með þessum sigri! Nú þurfa Sir Ferguson og hans lærisveinar bara að halda dampi í þeim leikjum sem eftir eru í deildinni. Þá verður fátt sem getur komið í veg fyrir að Man.utd hampi 17. Englandsmeistaratitlinum í vor.

Hargreaves tryggði United sigur með glæsimarki

"Gula pressan"

Hvernig stendur á því, að ég man bara alls ekki eftir því að hafa verið í þessu viðtali? Það er þá bara alveg stolið úr mér!

Ójafnrétti

Talsmenn glímusambandsins voru æfir þegar fréttist af því hversu há laun landsliðsmenn íslenska karlalandsliðsins í knattspyrnu fá fyrir þátttöku sína í leikjum þess. Haft var eftir Jóni Birgi Valssyni formanni glímusambandsins að ,,það sé fáránlegt að strákarnir okkar fái ekki jafn há laun og knattspyrnumennirnir þegar þeir hafa sýnt jafn góðan árangur og raun ber vitni á alþjóðlegum mótum."

Hér er Jón að vitna í alþjóðlegt mót sem haldið var á landinu nú fyrir skömmu þar sem Íslendingarnir hreinlega völtuðu yfir andstæðinga sína frá Svíþjóð, Belgíu og Hollandi svo dæmi megi nefna. Með mótinu fylgdust vel á tylft manna og er það til marks um þann uppgang sem er í íþróttinni.

,,Þetta staðfestir grun okkar sem lengi hefur verið uppi um það ójafnrétti sem er á milli íþrótta á Íslandi."

Að auki bætti Jón því við að farið verður í kröfugöngu þann 19. júní á næsta ári til þess að undirstrika fáránleika ójanréttis í íþróttum á Íslandi. Þar munu koma saman landsliðsmenn úr fjölmörgum íþróttum eins og Judó, Paint ball og keilu auk kvennalandsliðsins í knattspyrnu. En Aðspurður út í málið sagðist Jörundur Áki Sveinsson þjálfari kvennalandsliðsins þegar vera byrjaður að hanna skilti fyrir kröfugönguna á næsta ári.

,,Jú, það er rétt, á því stendur : Sömu laun fyrir sömu vinnu og Eyjólfur".

 

 

 

 

25 vísbendingar um að þú ert að verða gamall.

Þú veist hvenær þú ert að verða gamall þegar...

Þú ert sofandi en allir halda að þú sért dáinn
Þú ert með partí og nágrannarnir verða þess ekki varir.
Þú getur verið án kynlífs en ekki án gleraugna.
Þú ferð oftar í bakinu en þú ferð út.
Þú ert hættur að draga inn magann sama hver kemur inn.
Þú kaupir áttavita í bílinn.
Þú ert stoltur eigandi sláttuvélar.
Besti vinnur þinn er með stúlku sem er helmingi yngri... og er ekki að brjóta nein lög.
Handleggirnir á þér eru of litlir til að fletta blaðinu.
Þú syngur með laginu í lyftunni.
Þú vilt frekar fara í vinnu en að vera heima lasinn.
Þér finnst gaman að hlusta á aðra tala um spítaladvöl.
Þér finnst kaffi vera besti drykkur í heimi.
Fólk hringir í þig kl. 9 og spyr "var ég að vekja þig "?"
Þú svarar spurningu svona: "vegna þess að ég sagði það!"
Endinn á bindinu hjá þér kemur hvergi nálægt buxnaröndinni.
Þú ferð með málmleitartæki á ströndina.
Þú ert í svörtum sokkum þegar þú ert í sandölum.
Þú manst ekki eftir því hvenær þú lást á gólfinu til að horfa á sjónvarpið.
Þú ert með meira hár í eyrunum en á höfðinu.
Þú talar um "gott gras" en þú ert að tala um blettinn hjá nágrannanum.
Þú verður vondur þegar talað er um ellilífeyrinn.
Þú fékkst þér gervihnattadisk til að sjá veðurstöðina.
Þú getur farið í keilu án þess að drekka.

Mamma er sextug í dag

UPPVÖXTUR OG NÁM

Móðir mín elskuleg, Jóna Fríða Gísladóttir, er sextug í dag 6. apríl. Jóna Fríða fæddist í Hólslandi í Eyjahreppi, en ólst upp í Hausthúsum í sama hreppi. Hún sótti skólanám í Söðulsholti í Eyjahreppi. Árið 1968 stundaði hún nám við Húsmæðraskólann í Reykjavík og útskrifaðist þaðan sama ár. S.l tvö ár hefur mamma stundað nám, með vinnu, sem Efling stéttarfélag hefur staðið fyrir og nefnist skólabrú og er ætlað fyrir starfsfólk í leikskólum. Mamma útskrifaðist þaðan með fyrstu einkunn í desember s.l. sem leikskólaliði.

STARFSFERILL

Mamma var bóndi í félagsbúi í Hausthúsum ásamt pabba með afa og ömmu í kringum 1969-1970. Síðan var hún bóndi, ásamt pabba, í Akurholti í Eyjahreppi frá 1971-1984. Hvar þau voru fyrst með kindur, en eftir að garnaveiki kom upp í fénu og þ.l. þurfti að slátra því, skiptu þau yfir í hrossabúskap. Frá 1978-1984 gegndi hún starfi matráðskonu við Laugargerðiskóla á Snæfellsnesi. Eftir að mamma flutti til Reykjavíkur starfaði hún í mötuneytinu hjá húsgagnasmíðafyrirtækinu Víði HF í Kópavogi. Þaðan fór hún til starfa hjá lyfjafyrirtækinu Tóró. Eftir að hún ól Garðar bróðir í þennan heim 1986, vann hún tvö ár heima sem dagmamma.  Frá 1988 hefur mamma starfað á þremur leikskólum, Holtaborg, Ásborg og núna er hún á Maríuborg í Grafarholti. 

FJÖLSKYLDA 

Eiginmaður mömmu er Sævar Garðarsson múrari f. 12. nóv. 1946. Sonur þeirra er Garðar Sævarsson nemi í viðskiptafræði við HÍ f. 12. des. 1986.

Áður var mamma gift Vali Frey Jónssyni bílstjóra, föður mínum. Þau skildu 1984. Ég fæddist 20. september 1970 sama dag og réttað var í Þverárrétt. Sem varð til þess að bæði ég og mamma misstum naumlega af þeim réttum. Tengdadóttir mömmu, og þar með eiginkona mín, er María Pálsdóttir skrifstofum. f. 2. okt. 1964. Börn okkar Maríu eru; Indíana Björk nemi f. 5. des. 1995 og Trausti Freyr nemi f. 15. ág. 1999.

Systkini mömmu eru; Sigurgeir Gíslason trésmiður í Borgarnesi f. 25 jan. 1940, Bjarnheiður Gísladóttir leiðbeinandi í Rvík f. 30. apríl 1941, Magnús Gíslason vélvirki í Rvk f. 28. mars 1944 og Alda Svanhildur Gísladóttir sérkennari f. 17. feb. 1953

Foreldrar mömmu voru Gísli Sigurgeirsson f. 18. júní 1915, d. 12. ágúst 1994, bóndi í Hausthúsum og Auðbjörg Bjarnadóttir f. 27. júlí 1915, d. 7. júní 1993, húsfreyja í Hausthúsum. 

Mamma og Sævar eru að heiman á þessum merku tímamótum. Þau hjónin hafa dvalið í höfuðstað norðurlands, Akureyri, um helgina. Hvar þau hafa notið lífsins og lystisemda í góða veðrinu og menningunni þar í bæ. Þau snæddu mjög vel heppnaðan afmæliskvöldverð á "Friðriki V" þar sem var stjanað í kring um þau hjónin. Þá fóru þau einnig á leikverkið "Fló á skinni".

Mínar bestu afmælisóskir til þín mamma mín. Megi gæfa, hamingja og góð heilsa fylgja þér alla ævi. 

Þinn sonur,

Jón Birgir

 

 

JÓHANNES Á BORG, FYRSTI ATVINNUMAÐUR ÍSLENDINGA Í ÍÞRÓTTUM

 
Á sunnudagskvöldið s.l. fékk ég sms, frá Jóa Héðins félaga mínum í glímunni, um að nýhafinn væri þátturinn Andrarímur í umsjón Andra Thorssonar á Rás 1. Þáttur þessi innihélt að mestu leiti 45 ára gamalt viðtal sem Stefán Jónsson fréttamaður tók við Jóhannes Jósefson kenndan við Borg í tilefni 80 ára afmælis hans árið 1963. Stefán Jónsson reit æviminningar Jóhannesar á Borg um svipað leiti. Er þessi bók gríðarlega fróðleg og skemmtileg aflestrar.

Í útvarpsviðtalinu ræða þeir félagar um glímuna, sem hann taldi reyndar dauða þegar þetta viðtal var tekið, og einnig atvinnumennsku Jóhannesar erlendis, hvar hann keppti í ýmsu fangi ásamt glímu í fjöleikahúsum og öðrum opinberum vettvangi. Þá útlistar Jóhannes hvernig á hann rann berserksgangur þegar mótherjar hans höfðu rangt við með fólskubrögðum og svindli. Þjóðerniskennd Jóhannesar kemur glögglega í ljós í þessu viðtali og hvernig það stuðlar að því að hann ásamt öðrum stofna Ungmennafélag Íslands. Einnig talar Jóhannes um þær stórtæku framkvæmdir að byggja Hótel Borg þegar hann kemur heim úr atvinnumennskunni 1928. Frá því að fyrsta skóflustungan að hótelinu var tekin og þar til það var opnað 19. janúar 1930 kl 15.00, liðu 18 mánuðir. Hvet sem flesta til að hlusta á þennan merka mann sem enn þann dag í dag er mikil fyrirmynd margra glímumanna þar með töldum blogghöfundi.

Hér er viðtalið við Jóhannes á Borg (þátturinn er 1 klukkustund)

P.s. ég kem bráðlega með pistil um Íslandsglímu. 

Einu sinni voru tvær nunnur...

 

Einu sinni voru tvær nunnur á gangi í gegnum skóginn.

Önnur þeirra gekk undir viðurnefninu Systir Stærðfræði (SS), En hin var kunn undir viðurnefninu Systir Rökrétt (SR).

Það var farið að dimma og þær áttu ennþá langt eftir á áfangastað.

SS: Hefurðu veitt því athygli að síðustu 38 og hálfa mínútu hefur okkur verið veitt eftirför af einhverjum manni? Ég velti því fyrir mér hvað hann ætli sér.

SR: Það liggur ljóst fyrir að hann ætlar sér að gera okkur eitthvað.

SS: Almáttugur minn! á þessum tímapunkti mun hann ná okkur innan 15 mínútna hið minnsta! Hvað getum við gert?

SR: Það eina rökrétta í stöðunni er auðvitað að labba hraðar.

Stuttu síðar:

SS: Það er ekki að ganga upp.

SR: Auðvitað er það ekki að ganga upp. Maðurinn gerði það eina rökrétta í stöðunni. Hann fór líka að labba hraðar.

SS: Hvað eigum við þá að gera? Á þessari stundu mun hann ná okkur innan einnar mínútu.

SR: Það eina rökrétta í stöðunni fyrir okkur er að fara sitt í hvora áttina. Þú ferð þessa leið og ég tek hina leiðina. Þá getur hann ekki elt okkur báðar.

Því næst ákvað maðurinn að elta Systur Rökréttu. Systir Stærðfræði komst á áfangastað heilu á höldnu en hafði áhyggjur af því hvernig Systur Rökrétt hefði reitt af. Eftir nokkra mæðu kemur Systir Rökrétt loks á áfangastað.

SS: Systir Rökrétt ! Guði sé lof að þú sért komin! Hvað gerðist?

SR : Þar sem maðurinn gat eðlilega ekki elt okkur báðar, þá valdi hann þann möguleika að elta mig.

SS: Já, Já! En hvað gerðist svo?

SR: Nú ég reyndi að hlaupa eins hratt og ég gat, en þá fór hann einnig að hlaupa eins hratt og hann mögulega gat.

SS: Og?

SR: Það eina rökrétta gerðist á þessum tímapunkti. Hann náði mér.

SS: Guð minn góður! Og hvað gerðir þú?

SR: Það eina rökrétta sem ég gat gert og gerði.. Ég lyfti pilsi mínu upp.

SS: Oh, vesalings Systir! Hvað gerði maðurinn?

SR: Það eina rökrétta fyrir hann í stöðunni. Hann gyrti niður um sig.

SS: Æii, nei!! Hvað gerðist svo?

SR : Liggur það ekki í augum uppi, Systir? Nunna með pilsið upp um sig hleypur hraðar en maður með buxurnar á hælunum.

Og fyrir ykkur sem hélduð að þetta yrði eitthvað dónalegt og svæsið, bið ég fyrir ykkur !