Ég held'ann megi fara..

...ef þetta er upphæðin. Það er enginn maður svo ómissandi þegar svona fáránleg fjárhæð er í boði fyrir einn leikmann, jafnvel þó um sé að ræða Cristiano Ronaldo. Enda er ekki annað hægt að sjá, en að skínandi "rússagull" sé í boði frá Pétursborg! Fyrir þessa fjárhæð gætu Unitedmenn mögulega keypt þessa menn alla í einum pakka þá; Arshavin, Igor Akinfeev (markvörð), Pavlicenko, Zyrianov, Torbinski og Yuri Zhirkov. En eiga samt nógan afgang til að endurnýja liðsrútuna...

Þrettán milljarða fyrir Ronaldo

EM heima í stofu

Mér áskotnaðist þetta fótboltaspil á dögunum. Óhætt er að segja að þetta hafi vakið mikla lukku á heimilinu. Það eru búnar að fara fram margar HM og EM keppnir á þessu borði að undanförnu. Meira að segja húsmóðirin hefur ekki látið sitt eftir liggja í færni og knatttækni í þessu spili. Þetta er snilldar spil fyrir alla fjölskylduna......já og vinina. Myndirnar tala sínu máli...

 

 

 

 

 

 

 

 

 

 

 

 

 

 

 

 

 Trausti og Danni að spila á móti Nikulási og Indíönu

 

 

 

 

 

 

 

 

 

 

 

 

 

 

 

 

Gríðarleg keppni í gangi hjá mæðgunum. Einbeitingin leynir sér ekki! 

Frábært að fá þessi gömlu stórveldi NBA saman í úrslit!!

Þetta verður veisla fyrir flesta NBA körfuboltaunnendur. Minnir mann á gömlu góðu dagana þegar Larry Bird og Magic Johnson börðust hvað hatrammast með þessum liðum í úrslitunum um miðjan níunda áratuginn. Ég spái Lakers 4-3 sigri gegn Boston í þessu úrslitaeinvígi NBA. Ég veit að Orri, félagi minn og einhver mesti Celtics aðdáandi hér á landi, er ekki sammála mér í þessari spá. Þess má geta að Orri Björnsson keypti sér sérsaumaðan Boston Celtics búning í fyrra úti í Boston. Ekki nóg með að gallinn væri sérsaaumaður í anda níunda áratugarins, heldur lét Orri sérmerkja  hann með tölunni 33 og nafni Bird. Enda löngu hætt að selja búninga með nafni og númeri hetjunnar. 

 

Björnsson og Bird-inn: 

Boston og Lakers mætast í NBA-úrslitum

Mjög flottur flutningur hjá FÓ & RÓ

Þetta var frábær frammistaða hjá þeim Regínu Ósk og Friðriki Ómari í Belgrad í kvöld. Vonandi fleytir þessi frábæri og hnökralausi flutningur þeim í topp 10, að minnsta kosti. Annars fannst mér lögin frá Frakklandi, Finnlandi, Azerbatian, Úkrænu, Danmörku og Svíþjóð skara fram úr, ásamt TIML. ÁFRAM ÍSLAND!

Flutningur Eurobandsins gekk vel

Einstakur íþróttamaður í fremstu röð.

Ólafur Stefánsson er einhver sigursælasti og fremsti íþróttamaður sem Ísland hefur alið. Þrír Evrópumeistaratitlar Ólafs með tveimur liðum í handknattleik bera þess glöggt vitni. Leikur Ólafs í dag var á heimsmælikvarða og ber vott um þvílíkan snilling. Tólf mörk í leiknum í dag og 96 mörk í heildina hjá Ólafi í Evrópukeppninni setur hann á stall með þeim allra bestu. Heill sé þér Ólafur Stefánsson og til hamingju með frábæran árangur. Þrír titlar, Spánarmeistari, bikarmeistari og EVRÓPUMEISTARI með Ciudad Real er glæsilegt afrek. Þú ert land og þjóð til mikilla sóma.

Ólafur fagnaði Evrópumeistaratitlinum með stórleik

Það er farið að glitta í meistaratitilinn....

 

....hjá mínum mönnum í Manchester United. Þetta var stórglæsilegur sigur á annars sterku liði Arsenal. Stórt skref var stígið í átt að Meistaratitli með þessum sigri! Nú þurfa Sir Ferguson og hans lærisveinar bara að halda dampi í þeim leikjum sem eftir eru í deildinni. Þá verður fátt sem getur komið í veg fyrir að Man.utd hampi 17. Englandsmeistaratitlinum í vor.

Hargreaves tryggði United sigur með glæsimarki

JÓHANNES Á BORG, FYRSTI ATVINNUMAÐUR ÍSLENDINGA Í ÍÞRÓTTUM

 
Á sunnudagskvöldið s.l. fékk ég sms, frá Jóa Héðins félaga mínum í glímunni, um að nýhafinn væri þátturinn Andrarímur í umsjón Andra Thorssonar á Rás 1. Þáttur þessi innihélt að mestu leiti 45 ára gamalt viðtal sem Stefán Jónsson fréttamaður tók við Jóhannes Jósefson kenndan við Borg í tilefni 80 ára afmælis hans árið 1963. Stefán Jónsson reit æviminningar Jóhannesar á Borg um svipað leiti. Er þessi bók gríðarlega fróðleg og skemmtileg aflestrar.

Í útvarpsviðtalinu ræða þeir félagar um glímuna, sem hann taldi reyndar dauða þegar þetta viðtal var tekið, og einnig atvinnumennsku Jóhannesar erlendis, hvar hann keppti í ýmsu fangi ásamt glímu í fjöleikahúsum og öðrum opinberum vettvangi. Þá útlistar Jóhannes hvernig á hann rann berserksgangur þegar mótherjar hans höfðu rangt við með fólskubrögðum og svindli. Þjóðerniskennd Jóhannesar kemur glögglega í ljós í þessu viðtali og hvernig það stuðlar að því að hann ásamt öðrum stofna Ungmennafélag Íslands. Einnig talar Jóhannes um þær stórtæku framkvæmdir að byggja Hótel Borg þegar hann kemur heim úr atvinnumennskunni 1928. Frá því að fyrsta skóflustungan að hótelinu var tekin og þar til það var opnað 19. janúar 1930 kl 15.00, liðu 18 mánuðir. Hvet sem flesta til að hlusta á þennan merka mann sem enn þann dag í dag er mikil fyrirmynd margra glímumanna þar með töldum blogghöfundi.

Hér er viðtalið við Jóhannes á Borg (þátturinn er 1 klukkustund)

P.s. ég kem bráðlega með pistil um Íslandsglímu. 

Allt er (næstum því) fertugum fært.

Þessi jafnaldri minn verður bara betri með hverju árinu. Það mátti glöggt sjá s.l. laugardag þegar hann var einn besti maður síns liðs á móti mínu liði í enska boltanum, Manchester united. David James er fastamaður í sínu liði ásamt því að vera í landsliði Englendinga (síðast þegar ég vissi). Þessi þriggja ára samningur David James við lið sitt vekur mann til umhugsunar hvort menn séu yfirleitt að hætta of snemma í keppnisíþróttum á meðal þeirra bestu? Sjálfur er ég verulega farinn að draga úr þátttöku í Íslandsmótum á vegum Glímusambandsins. Kannski að maður ætti að endurskoða það eitthvað? Og þó, er orðinn saddur..........í bili.

James samdi við Portsmouth til 2010

SIGUR SVÖNU HRANNAR Á TRISH STRATUS ÖRUGGUR

 
Eins og við vara að búast þá bar Svana Hrönn Jóhannsdóttir Glímudrottning Íslands sigur úr bítum í fimm lotu glímu við áskoranda sinn, Trish Stratus 7 faldan WWE meistara frá Kanada 3-2. Þrátt fyrir að tölurnar gefi til kynna að um jafna og spennandi keppni hafi verið að ræða. Þá verður að segjast að tölurnar gefa ekki alveg rétta mynd af yfirburðum Svönu Hrönn í einvíginu. Það segir sig nokkuð sjálft að manneskja sem aldrei hefur tekið í glímubelti fyrr sem kemur og tekur tvær 3ja klukkustunda glímuæfingar, er ekki að fara sigra ríkjandi meistara í íþróttinni, þó svo Tris hafi staðið sig frábærlega í einvíginu. Þá hafði Svana Hrönn örugglega tögl og haldir frá upphafi til enda þess.

 En Trish Stratus til hróss er að hún er mikill íþróttamaður með sterkan karakter og mikið sjálfstraust. Enda hefði hún varla náð svona langt í WWE annars, þó svo að þar sé meira gert út á "show-ið" heldur en keppnina. Þessir eiginleikar komu bersýnilega í ljós á glímuæfingunum tveimur sem hún mætti á. Hún var einstaklega ósérhlífinn og einbeitt í því sem hún var að gera og lagði mikið á sig til þess að læra glímutæknina sem er hreint ekki auðvelt á svo skömmum tíma.  Sérstaklega var gaman að sjá til hennar á seinni æfingunni þar sem hún virtist öllu sprækari en kvöldinu áður, enda ný kominn úr flugi þá. Öfugt við fyrri æfinguna þá gat hún nú tekið 75 kg. mann (Auðunn Elvarsson) og snarað honum á háum mjaðmarhnykk í gólfið. Pétur Eyþórs stjórnaði ketilbjölluæfingu áður en að glímunni kom. Dró Trish hvergi af sér í þeim átökum. Á glímuæfingunni sjálfri fékk hún að glíma við þrjá glímumenn undir handleiðslu Péturs og mín á meðan sjónvarpsvélarnar gengu. Í restina á æfingunni fékk hún enn einn glímumanninn til að takast á við og þá var slökkt á vélunum og við Pétur drógum okkur í hlé.

Eins og sést á meðfylgjandi myndum þá var Svana Hrönn á seinni æfingunni, enda vön því að æfa með okkur KR-ingunum alla jafnan og mikill félagi okkar. Það var einmitt Svana Hrönn sem tók Trish í síðustu glímukennsluna fyrir átökin. Hljómar undarlega en þetta sýnir Svönu Hrönn í hnotskurn hversu frábær karakter hún er. Þarna var hún komin til að miðla af glímukunnáttu sinni til Trish, því Svönu Hrönn var það ekkert síður í mun, en Kanadísku stallsystur hennar, að Trish gæti lært sem mest og best fyrir þetta einvígi svo það yrði vandað og án hnökra. Rétt eins og með allar sýningar og keppnir, þá skiptir höfuðmáli að vera vel undirbúinn fyrir áttökin. Þetta var Svana Hrönn, án efa, með í huga fyrir keppinaut sinn. 

Þá að einvígiskvöldinu þar sem byrjað var á því að blása til einvígis í karla flokki fyrir Kanadíska sjónvarpið milli austurs og vesturs, Snær Seljan Þóroddsson ÚÍA Reyðarfirði og Magni Þór Annýjarson Herði Ísafirði, sem endaði 3-2 Snæ í vil. Þetta var virkilega flott einvígi hjá strákunum. Eftir viðureignir strákanna var komið að stóru stund kvöldsins, einvígi drottninganna tveggja. Stemmningin var betri en nokkru sinni fyrr á glímumótum sem undirritaður hefur mætt á. Enda fullt út úr dyrum í fangbragðasal Ármanns. Í þeim hópi voru stuðningsmenn Svönu, vinnufélagar hennar frá Vífilfelli og dyggur vinkonu- og vinahópur sem veittu henni frábæran stuðning. Ekki var minni hópurinn sem fylgdu Trish Stratus að máli, aðdáendur hennar sem voru miklir WWE unnendur höfðu heldur betur dottið í lukkupottinn að fá þessa frábæru stjörnu úr WWE til landsins. Sýndu þeir stuðning og þakklæti sitt svo sannarlega í verki. Þá eru ótaldir allir þeir glímumenn sem þarna voru og flestir á bandi Svönu Hrannar.

Keppendur voru kynntir inn, fyrst var Svana Hrönn kynnt inn í sínum svarta glímubúningi með grænum ermum sem hún notaði eitt sinn þegar GFD og KR sendu sameiginlega sveit í kvennaflokki. Á eftir henni var Trish Stratus kölluð inn í salinn. En hún var í svörtum glansbuxum með bleikri rönd niður eftir sitthvorri skálminni og á sitjandanum var áletrað nafnið hennar einnig í bleikum stöfum. Trish hafði orðið sér út um svartan bol með áletruninni "Lost in Iceland" Þetta kallast að hafa húmor fyrir sjálfum sér. Eftir að keppendur höfðu verið kynntir til leiks með miklum fagnaðarlátum, hófst einvígið. Það tók Svönu aðeins örfáar sekúndur að leggja Trish á vel útfærðum hælkrók hægri á hægri. Í næstu lotu sigraði Trish Svönu á hælkrók hægri á vinstri eftir góða glímu þeirra beggja. Annars má sjá viðureignir þeirra í meðfylgjandi link frá Stöð 2 veftíví. Að einvíginu loknu tóku við viðtöl hjá stelpunum og eiginhandaráritanir. Það var aðdáunarvert að sjá hvað Trish gaf sér góðan tíma fyrir hvern og einn í myndatökur, svara spurningum, áritanir og jafnvel smá wrestlingtök. Mjög jarðbundin manneskja með mikla útgeislun. Allt saman gerði hún þetta með bros á vör í röskan hálftíma. Eftir stendur mikið þakklæti okkar glímumanna til Trish og hennar fólks fyrir að velja glímuna sem viðfangsefni í sjónvarpsþátt sinn. Næst halda þau til Indlands á vit ævintýra til að kynna sér stikuskylmingar.

Svönu Hrönn Jóhannsdóttur hef ég til skýjanna eftir þessa frammistöðu á miðvikudagskvöldið og gæti hún jafnvel átt erindi í WWE því hún fór með sýna rullu að þvílíkri snilld, sem og að taka þátt í leiknum fyrir Kanadíska sjónvarpið líkt og hún hafi aldrei gert annað. Hélt Svana áhorfendum á tánum allan tímann en hafði þetta samt allt í hendi sér. Þegar hún lagði Trish, þá varð það gert að slíkri mýkt að ekki heyrðist hljóð úr gólfi, Því hún lagði hana líkt og ungbarn í vöggusæng. Þetta fannst mér stórkostlegt að sjá og ber vitni um glímumann með fullkomna stjórn á brögðum sínum. Svana Hrönn er ekki bara toppíþróttamaður heldur líka frábær persóna og góður talsmaður glímunnar útá við.

Oft gleymist að þakka þeim sem standa að þessu öllu saman á bak við tjöldin. Þar á Lárus Kjartansson framkvæmdastjóri GLÍ hrós skilið fyrir að skipuleggja komu hópsins hingað til lands ásamt því að gera atburðinn jafn góðan eins og honum einum er lagið.

Ég vil nota tækifærið og þakka Hansa og hans samstarfsfólki á Stöð 2 fyrir að gera einvíginu svona góð skil og sýna allar loturnar. Eins og heyra mátti á umsjónarmönnum "Íslands í dag" þeim Svanhildi og Þorfinni, voru þau mjög áhugasöm um að fylgja Svönu og Trish í kjölfarið og fara í glímueinvígi. Ég skora hér með á þau að láta verða af því, þau geta haft samband við undirritaðan eða Lárus framkvæmdastjóra GLÍ til að hægt sé að aðstoða þau með þjálfun og skipulag einvígisins.

http://vefmidlar.visir.is/VefTV/?channelID=STOD2&programID=b2fab606-e8f9-4500-a4d9-15008d8978da&mediaSourceID=e61ecab0-90d4-466e-9229-bb8374d1b09d

http://vefmidlar.visir.is/VefTV/?channelID=STOD2&programID=7821563b-9165-4085-a32a-7d7d079d9558&mediaSourceID=81829c01-cc66-4581-a186-64c112ccae05

 

 

 

 

 

 

 

 

Trish og Svönu varð strax vel til vina. 

 

 

 

 

 

 

 

 

Axlarupphitun fyrir bjöllur. 

 

 

 

 

 

 

 

 

Upphitun

 

 

 

 

 

 

 

 

 

Hlustað á þjálfarann. 

 

 

 

 

 

 

 

 

Og svo pressa upp! 

 

 

 

 

 

 

 

 

Tekið á ketilbjöllunum. 

 

 

 

 

 

 

 

 

Trish hlustar á góð ráð frá Pétri þjálfara sínum.  

 

 

 

 

 

 

 

 

Höfundur í félagsskap með frábærum glímukonum. 

 

 

 

 

 

 

 

 

T-in 3 Trish, Trausti og thjálfarinn. 

Trish laut í lægra haldi

SVANA HRÖNN JÓHANNSDÓTTIR Í EINVÍGI VIÐ TRISH STRATUS

Trish Stratus er að koma til landsins á morgun frá Noregi, hvar hún var að taka upp sjónvarpsþátt fyrir Kanadíska sjónvarpsstöð sem er á ferð um heiminn  og nú er komið að Íslandi.

Um síðustu helgi spurði framkvæmdastjóri Glímusambandsins mig og Pétur Eyþórsson, núverandi Glímukóng, hvort við gætum ekki tekið að okkur að þjálfa fjölbragðaglímukonu frá Kanada sem væntanleg væri í byrjun mars til Íslands til að keppa í glímu við bestu glímukonu landsins. Án þess að hafa kynnt okkur hver manneskjan væri eða hversu fræg hún væri í US and A. Þá samþykktum við að taka verkefnið að okkur þó þjálfunartíminn til þess væri of stuttur að okkar mati fyrir einvígið (2 æfingar). Einnig var okkur sagt frá því að Kanadísk sjónvarpsstöð væri með í för sem myndu láta tökuvélarnar ganga á æfingunum og jafnvel utan þeirra. 

Svo leið tíminn og í gær var ég minntur á að Kanadíska sjónvarps hersingin, með Trish Stratus í broddi fylkingar, væri að koma til landsins núna á sunnudaginn. Þá fór maður aðeins að kynna sér þessa manneskju og komst að ýmsu. M.a. að hún væri 7 faldur heimsmeistari í WWE (World Wrestling Entertainment) ásamt því að  hafa verið valin "babe of the year" og díva áratugarins. Þá er hún allþekkt úr hinum ýmsu sjónvarpsþáttum og tímaritum.  Þannig að um er að ræða Kanadískt "seleb"!

Þó svo að ég hafi tekið það að mér, ásamt Pétri, að kenna konunni glímu, þá hef ég takmarkaða trú á að Trish verði mikið ágengt með Svönu Hrönn Jóhannsdóttur glímudrottningu Íslands. Því glíman er mikil tækni íþrótt sem ekki lærist á tveimur dögum! En að sjálfsögðu reynum við að gera okkar besta til að kenna Trish Stratus sem mest á þessum stutta tíma. Hún gæti mögulega byggt á þeim grunni sem hún hefur úr WWE en við sjáum hvað setur. Ef vel gengur hjá henni, þá er aldrei að vita nema hún taki þátt í fyrsta heimsmeistaramótinu í Glímu sem fram fer í Hróarskeldu n.k. ágúst fyrir hönd Kanada.

Fyrir þá sem lítt eru kunnir WWE, Þá er þetta að mestu leiti um "show business" að ræða og úrslit ákveðin fyrirfram. Þess má geta að "World Wrestling Entertainment" var stofnað af HULK HOGAN og er að hluta eða öllu leiti enn í hans eigu. Þetta er með vinsælla sjónvarpsefni í USA og rakar inn peningum

Ég bendi fólki á að skoða myndbönd af Trish Stratus inn á www.youtube.com  

 

Glímugella gegn glímudrottningu