SIGUR SVÖNU HRANNAR Á TRISH STRATUS ÖRUGGUR

 
Eins og við vara að búast þá bar Svana Hrönn Jóhannsdóttir Glímudrottning Íslands sigur úr bítum í fimm lotu glímu við áskoranda sinn, Trish Stratus 7 faldan WWE meistara frá Kanada 3-2. Þrátt fyrir að tölurnar gefi til kynna að um jafna og spennandi keppni hafi verið að ræða. Þá verður að segjast að tölurnar gefa ekki alveg rétta mynd af yfirburðum Svönu Hrönn í einvíginu. Það segir sig nokkuð sjálft að manneskja sem aldrei hefur tekið í glímubelti fyrr sem kemur og tekur tvær 3ja klukkustunda glímuæfingar, er ekki að fara sigra ríkjandi meistara í íþróttinni, þó svo Tris hafi staðið sig frábærlega í einvíginu. Þá hafði Svana Hrönn örugglega tögl og haldir frá upphafi til enda þess.

 En Trish Stratus til hróss er að hún er mikill íþróttamaður með sterkan karakter og mikið sjálfstraust. Enda hefði hún varla náð svona langt í WWE annars, þó svo að þar sé meira gert út á "show-ið" heldur en keppnina. Þessir eiginleikar komu bersýnilega í ljós á glímuæfingunum tveimur sem hún mætti á. Hún var einstaklega ósérhlífinn og einbeitt í því sem hún var að gera og lagði mikið á sig til þess að læra glímutæknina sem er hreint ekki auðvelt á svo skömmum tíma.  Sérstaklega var gaman að sjá til hennar á seinni æfingunni þar sem hún virtist öllu sprækari en kvöldinu áður, enda ný kominn úr flugi þá. Öfugt við fyrri æfinguna þá gat hún nú tekið 75 kg. mann (Auðunn Elvarsson) og snarað honum á háum mjaðmarhnykk í gólfið. Pétur Eyþórs stjórnaði ketilbjölluæfingu áður en að glímunni kom. Dró Trish hvergi af sér í þeim átökum. Á glímuæfingunni sjálfri fékk hún að glíma við þrjá glímumenn undir handleiðslu Péturs og mín á meðan sjónvarpsvélarnar gengu. Í restina á æfingunni fékk hún enn einn glímumanninn til að takast á við og þá var slökkt á vélunum og við Pétur drógum okkur í hlé.

Eins og sést á meðfylgjandi myndum þá var Svana Hrönn á seinni æfingunni, enda vön því að æfa með okkur KR-ingunum alla jafnan og mikill félagi okkar. Það var einmitt Svana Hrönn sem tók Trish í síðustu glímukennsluna fyrir átökin. Hljómar undarlega en þetta sýnir Svönu Hrönn í hnotskurn hversu frábær karakter hún er. Þarna var hún komin til að miðla af glímukunnáttu sinni til Trish, því Svönu Hrönn var það ekkert síður í mun, en Kanadísku stallsystur hennar, að Trish gæti lært sem mest og best fyrir þetta einvígi svo það yrði vandað og án hnökra. Rétt eins og með allar sýningar og keppnir, þá skiptir höfuðmáli að vera vel undirbúinn fyrir áttökin. Þetta var Svana Hrönn, án efa, með í huga fyrir keppinaut sinn. 

Þá að einvígiskvöldinu þar sem byrjað var á því að blása til einvígis í karla flokki fyrir Kanadíska sjónvarpið milli austurs og vesturs, Snær Seljan Þóroddsson ÚÍA Reyðarfirði og Magni Þór Annýjarson Herði Ísafirði, sem endaði 3-2 Snæ í vil. Þetta var virkilega flott einvígi hjá strákunum. Eftir viðureignir strákanna var komið að stóru stund kvöldsins, einvígi drottninganna tveggja. Stemmningin var betri en nokkru sinni fyrr á glímumótum sem undirritaður hefur mætt á. Enda fullt út úr dyrum í fangbragðasal Ármanns. Í þeim hópi voru stuðningsmenn Svönu, vinnufélagar hennar frá Vífilfelli og dyggur vinkonu- og vinahópur sem veittu henni frábæran stuðning. Ekki var minni hópurinn sem fylgdu Trish Stratus að máli, aðdáendur hennar sem voru miklir WWE unnendur höfðu heldur betur dottið í lukkupottinn að fá þessa frábæru stjörnu úr WWE til landsins. Sýndu þeir stuðning og þakklæti sitt svo sannarlega í verki. Þá eru ótaldir allir þeir glímumenn sem þarna voru og flestir á bandi Svönu Hrannar.

Keppendur voru kynntir inn, fyrst var Svana Hrönn kynnt inn í sínum svarta glímubúningi með grænum ermum sem hún notaði eitt sinn þegar GFD og KR sendu sameiginlega sveit í kvennaflokki. Á eftir henni var Trish Stratus kölluð inn í salinn. En hún var í svörtum glansbuxum með bleikri rönd niður eftir sitthvorri skálminni og á sitjandanum var áletrað nafnið hennar einnig í bleikum stöfum. Trish hafði orðið sér út um svartan bol með áletruninni "Lost in Iceland" Þetta kallast að hafa húmor fyrir sjálfum sér. Eftir að keppendur höfðu verið kynntir til leiks með miklum fagnaðarlátum, hófst einvígið. Það tók Svönu aðeins örfáar sekúndur að leggja Trish á vel útfærðum hælkrók hægri á hægri. Í næstu lotu sigraði Trish Svönu á hælkrók hægri á vinstri eftir góða glímu þeirra beggja. Annars má sjá viðureignir þeirra í meðfylgjandi link frá Stöð 2 veftíví. Að einvíginu loknu tóku við viðtöl hjá stelpunum og eiginhandaráritanir. Það var aðdáunarvert að sjá hvað Trish gaf sér góðan tíma fyrir hvern og einn í myndatökur, svara spurningum, áritanir og jafnvel smá wrestlingtök. Mjög jarðbundin manneskja með mikla útgeislun. Allt saman gerði hún þetta með bros á vör í röskan hálftíma. Eftir stendur mikið þakklæti okkar glímumanna til Trish og hennar fólks fyrir að velja glímuna sem viðfangsefni í sjónvarpsþátt sinn. Næst halda þau til Indlands á vit ævintýra til að kynna sér stikuskylmingar.

Svönu Hrönn Jóhannsdóttur hef ég til skýjanna eftir þessa frammistöðu á miðvikudagskvöldið og gæti hún jafnvel átt erindi í WWE því hún fór með sýna rullu að þvílíkri snilld, sem og að taka þátt í leiknum fyrir Kanadíska sjónvarpið líkt og hún hafi aldrei gert annað. Hélt Svana áhorfendum á tánum allan tímann en hafði þetta samt allt í hendi sér. Þegar hún lagði Trish, þá varð það gert að slíkri mýkt að ekki heyrðist hljóð úr gólfi, Því hún lagði hana líkt og ungbarn í vöggusæng. Þetta fannst mér stórkostlegt að sjá og ber vitni um glímumann með fullkomna stjórn á brögðum sínum. Svana Hrönn er ekki bara toppíþróttamaður heldur líka frábær persóna og góður talsmaður glímunnar útá við.

Oft gleymist að þakka þeim sem standa að þessu öllu saman á bak við tjöldin. Þar á Lárus Kjartansson framkvæmdastjóri GLÍ hrós skilið fyrir að skipuleggja komu hópsins hingað til lands ásamt því að gera atburðinn jafn góðan eins og honum einum er lagið.

Ég vil nota tækifærið og þakka Hansa og hans samstarfsfólki á Stöð 2 fyrir að gera einvíginu svona góð skil og sýna allar loturnar. Eins og heyra mátti á umsjónarmönnum "Íslands í dag" þeim Svanhildi og Þorfinni, voru þau mjög áhugasöm um að fylgja Svönu og Trish í kjölfarið og fara í glímueinvígi. Ég skora hér með á þau að láta verða af því, þau geta haft samband við undirritaðan eða Lárus framkvæmdastjóra GLÍ til að hægt sé að aðstoða þau með þjálfun og skipulag einvígisins.

http://vefmidlar.visir.is/VefTV/?channelID=STOD2&programID=b2fab606-e8f9-4500-a4d9-15008d8978da&mediaSourceID=e61ecab0-90d4-466e-9229-bb8374d1b09d

http://vefmidlar.visir.is/VefTV/?channelID=STOD2&programID=7821563b-9165-4085-a32a-7d7d079d9558&mediaSourceID=81829c01-cc66-4581-a186-64c112ccae05

 

 

 

 

 

 

 

 

Trish og Svönu varð strax vel til vina. 

 

 

 

 

 

 

 

 

Axlarupphitun fyrir bjöllur. 

 

 

 

 

 

 

 

 

Upphitun

 

 

 

 

 

 

 

 

 

Hlustað á þjálfarann. 

 

 

 

 

 

 

 

 

Og svo pressa upp! 

 

 

 

 

 

 

 

 

Tekið á ketilbjöllunum. 

 

 

 

 

 

 

 

 

Trish hlustar á góð ráð frá Pétri þjálfara sínum.  

 

 

 

 

 

 

 

 

Höfundur í félagsskap með frábærum glímukonum. 

 

 

 

 

 

 

 

 

T-in 3 Trish, Trausti og thjálfarinn. 

Trish laut í lægra haldi

Athugasemdir

[Heimir Lárusson Fjeldsted, 7.3.2008 kl. 13:33]

Þakka frábæran pistil.

[Jón Birgir Valsson, 7.3.2008 kl. 13:40]

Þakka hólið Heimir og verði þér að góðu.

[Pétur Eyþórsson, 7.3.2008 kl. 19:40]

Bara að benda á að fréttirnar hafa ruglast eitthvað á leiðinni vestur um haf því þar segja menn að Trish hafi sigrað Svönu 3-2.

http://www.wwe.com/inside/industrynews/6588024

http://www.lordsofpain.net/news/2008/articles/1204831203.php 

[Jón Birgir Valsson, 8.3.2008 kl. 11:36]

Þetta minnir óneitanlega á fréttaflutning í Hollywood stíl. Hvaðan ætli www.wwe.com og www.lordsofpain.net hafi þessar upplýsingar? Reyndar er síðarnefnda síðan með beinan link á www.glima.is , sennilega átt e-ð erfitt með að lesa í íslenskuna og þær tölur sem þar birtast úr einvíginu. Sem betur fer þá er einvígið til í heild sinni hjá stöð 2. Ef til þess kemur að leiðrétta þurfi úrslitin fyrir Ameríkumönnum. Youtube er vinsælli en þessir tvær síður til samans.

[Steini (IP-tala skráð) 8.3.2008 kl. 19:17]

Svakalega tókstu þig vel út á skjánum mínum hér um kvöldið þegar þú varst að dæma glímuna annars þakka ég þér gott hól í minn garð á minni síðu kveðja GOLF STEINI

[Doddi - Þorsteinn G. Jónsson (IP-tala skráð) 8.3.2008 kl. 19:26]

Æðislegur pistill hjá þér Jón Birgir, virkilega flottur! Smá öfund í gangi hjá mér ... það verður að viðurkennast en takk fyrir myndirnar og linkana á vídeóin. Þú tekur þig glæsilega út milli tveggja fagurra kvenna þarna!

Bestu kveðjur úr norðrinu!

[Jón Birgir Valsson, 8.3.2008 kl. 22:03]

Takk kærlega fyrir hólið Doddi! Maður bara. Ekki langt að bíða að Íslandsglíman fari fram í þínu nágrenni. Nánar tiltekið 29. mars í Síðuskóla. Ég get lofað þér því Svana Hrönn mætir til að verja Freyjumenið, en minni líkur er á að fá Trish þangað, enda ekki gjaldgeng í Íslandsglímu.

Bestu kveðjur til þín norður.

[Þórunn Eva , 8.3.2008 kl. 22:46]

Flottur Pistill....

[Jón Birgir Valsson, 8.3.2008 kl. 22:51]

Takk fyrir það Þórunn Eva.